12-2-2019. Tgei capeta sch'in tren dalla Viafier Matterhorn Gottard ha in accident sil tschancun digl Alpsu? Quella damonda fatschenta las organisaziuns da salvament ensemen culs possessurs dalla viafier gia dapi onns. Consequentamein han ins elaborau in concept per esser preparaus pigl accident. Cunquei che pliras organisaziuns da cazzola blaua da dus differents cantuns ein cumpigliadas, ei la caussa buca schi sempla. 

La sera tard dils 12 da fevrer 2019 vegn exercitau in accident el tunnel sissum il pass. Las temperatiras ein fetg freidas, las cundiziuns da lavur, sper la stgiraglia notg, tut autras che bunas: igl ei stretg e rodund 70 persunas ston luvrar el tunnel. Lur pensum: evacuar rodund 30 persunas dil tren, da quei 5 persunas miez tochen fetg grevamein blessadas. Rodund ina ura cuoza l'acziun da salvament. Ei vegn luvrau professiunalmein sco sche las gruppas luvrassen gia adina ensemen. Igl exercezi muossa spert las fermezias, mo era fleivlezias. En tut priu ei igl exercezi gartegiaus, singulas caussas san vegnir migliuradas. Quei vegn a capitar ellas proximas jamnas per che tut seigi preparau sch'ei vess inagada da dar in accident cul tren denter Mustér ed Andermatt.

Suandontas organisaziusn ein stadas en acziun:

  • 35 pumpiers (Basas Sursassiala ed Andermatt)
  • 13 polizists (Grischun ed Uri
  • 15 sanitars d'urgenza (Surselva ed Uri)
  • 3 emploiai MGB
  • 15 observaturs da tuttas organisaziuns

Sper ils accidents da viafier vegnan las medemas organisaziuns en acziun tier accidents sin via. Contracts denter ils dus cantuns reglan las intervenziuns.

Fotos: MGB, Pumpiers Sursassiala (ulteriurs maletgs suondan)