Adatg!!!

Sin gl'entir territori cantunal vala naven dils 25 da mars 2020 fin alla revocaziun in scamond general da far fiug. Exceptada da quei ei la zona da habitadi, aschianavon ch'ei po vegnir observau ina distanza digl uaul da 50 m. Il scamond da far fiug vala er per tut las fueinas lubidas.

Informaziuns impurtontas davart COVID-19

La situaziun pandemica momentana pretenda da tuts gronds sforzs, aschia era tier nus sco organisaziun da salvament. Tuttina stuein nus esser prompts da tut temps ed aschia era ver quitau da nossa sanadad. Perquei ein tuts exercezis e cuors pil mument aboli.

Dapi ils 21 da mars purschin nus ensemen cull'Apoteca Desertina a Mustér in survetsch special per tuttas persunas dalla Sursassiala ch'ein visadas vi sin lur medicaments, san denton buca ir per tals ell'apoteca muort malsogna ni ord motivs da risico. Fagei aschi bien e contactei l'apoteca che coordinescha cun nus la furniziun. Pachets buca urgents vegnan furni il medem di encunter sera. Il survetsch sebasa sin lavur cumina ed ei gratuits.


Ti sesanflas silla pli veglia pagina da pumpiers dil cantun Grischun. Dapi la stad 1998 (dapi 2001 sut atgna adressa) provedin nus la publicitad cun informaziuns davart noss'organisaziun, quei per romontsch e tudestg. Medemamein anflas ti era nus tier Facebook  ed Instagram nua che nus presentein fatgs cuorts e nua ch'in Like-it fagess plascher a nus! Nossa pagina cuntonscha buc mo persunas indigenas, mobein ei era enconuschenta lunsch sur ils cunfins dalla tiara. Aschia vein nus gia astgau retscheiver in premi sco ina dallas tschun meglieras paginas da pumpiers dalla Svizra.

Ils pumpiers da Medel/Lucmagn, Tujetsch e Mustér fuorman communablamein in'organisaziun da pumpiers, tenor la surfatscha la gronda dil cantun Grischun. Sper las lavurs da basa provedin nus era la regiun Cadi sco center d'intervenziun e purschin ulteriurs survetschs naziunals. Sin nossa homepage anflas ti tuttas informaziuns impurtontas davart noss'organisaziun, rapports da seracass, informaziuns per la prevenziun ed aunc bia auter. 

Ti vesas - nus sespruein da porscher in bien survetsch d'informaziun. Aschia giavischein nus a ti bien divertiment da fuffergnar tras nossas informaziuns.

Tes Pumpiers Sursassiala